АРХЕОГРАФИЧЕСКІЙ СБОРНИКЪ ДОКУМЕНТОВЪ ОТНОСЯЩИХСЯ КЪ ИСТОРІИ СѢВЕРОЗАПАДНОЙ РУСИ ИЗДАВАЕМЫЙ ПРИ УПРАВЛЕНІИ ВИЛЕНСКАГО, УЧЕБНАГО ОКРУГА Томъ первый. ВИЛЬНА Печатня Губернскаго Правленія 1867

Смотри также расширенную версию этого же документа, опубликованную в сборнике «Акты, издаваемые Комиссиею, высочайше учрежденною для разбора древних актов в Вильне. Т.14: Инвентари имений XVI-го столетия», опубликованную на нашем сайте.

{205}

109.
1507 г. 23 Октября. Раздѣлъ Косовскаго имѣнія между
Григорьемъ Сангушкой и Николаемъ Кишкой
и инвентарь этого имѣнія.

Реестръ списанья двора, Фольварковъ, мѣстечка и волости имѣнья Косовского, роздѣловъ чынечы на двѣ части ровные того имѣнья, водлѣ отосланья а наказу декрету трыбунальского, межи ихъ милостей вельможныхъ пановъ князя Грыгорья Санкгушка Коширского, кашталяна Любачевского, а пана Миколая Кишки на Техоновцу, старосты Дорогицкого, черезъ мене, Григорья Трызну, подкоморего Слонимского, року тисеча петсотъ деветдесятъ семого, мѣсеца Октебра двадцать третего дня.

А напервѣй роздѣленье плацу селидбы дворное двора Косовского и будованья на немъ будучого и огороду овощового, при дворѣ лежачого.

Пляцу дворпого зъ огородомъ овощовымъ и зъ городищомъ вымѣроно моркговъ два, прутовъ шесть. Того пляцу на сторону его милости князя Григорья Коширского зъ выдѣлку зостало: зъ огородомъ моркгъ одинъ, прутовъ тры, лежачый отъ ставу середнего на рѣццѣ Лодейницы, въѣхавшы въ дворъ, полѣвѣ. А на сторону его милости пана Миколая Кишки, старосты Дорогицкого, такъ же много: моргкъ одинъ и прутовъ тры зостало отъ городища, въѣхавшы въ дворъ, по правѣ.

А будованье, што его было на томъ пляцу селидбы дворное, такій роздѣлокъ есть учиненъ:

На сторону его миолости пана старосты Дорогицкого зостало се будованья, то есть: домъ подъ городищемъ, изба не малая, тесаная, съ коморою пры боку; напротивку изба жъ бѣлая зъ дерева облого и зъ коморою пры боку; печы въ нихъ полеваные, старые, съ коминами простыми; въ тыхъ избахъ оболонъ скляныхъ, въ оловъ {206} оправованыхъ, по чотыры. Подлѣ дому тесаного, до стаень идучы, по правой руцѣ подъ городищомъ сверенъ зъ кганкгомъ и съ пивницою подъ нимъ. Подлѣ тогожъ свирна стаень двѣ, одна драницами побита, а другая соломою крыта. Зъ другое стороны, близу свѣтлицы противное, по лѣвой руцѣ клѣтка, подъ нею пивница. Кухня великая, старая, при ней издебка малая, варывная. Пекарня великая, старая, зъ сѣнью; броваръ старый; бойничка на городищу; холодника съ побитемъ половица; дерева тесаного, што было въ будованью, осмънадцять, а нового брусовъ дватцать.

А на сторону его милости князя Кошырского зостало будованья, то есть: домокъ, надъ ставомъ въ долинѣ збудованый: избы бѣлые двѣ, противъ себе, комнатекъ тры пры бокохъ, окна шкляные; домокъ у воротъ старый: свѣтлочки противъ себе двѣ, пры одной свѣтлочцѣ комора одна, при боку сверенковъ старыхъ два; слодовня; лазня зъ сѣнцами; стаенка малая пры псарни сполне съ псарнею съ покрытьемъ старымь драницъ, такъ же и зрубъ облого дерева на стайню; а ижъ ани балекъ, ани козловъ до тое стайни нѣтъ, тогды дерева круглого, которого есть у дворѣ бервенъ сорокъ, то прыдало се на доправенье тое стайни; ворота зъ бойничкою на нихъ, холодника, который збудованъ посродъ двора съ побитьемъ, половица, дерева тесаного, што было въ будованью, осмнатцать, а нового брусья дватцать. Якожъ тое помененое будованье, которое стоить на половицы пляцу селидбы его милости пана старосты Дорогицкого, его милость князь Кошырскій маеть и повиненъ будеть на свою половицу надалѣй до Святокъ, водлѣ календара старого, въ року прыйдучомъ деветьдесять осмомъ перенести.

Уѣздъ до двора вольный черезъ греблю и до воды на обѣ сторонѣ зоставаеть. Пры томъ дворѣ за огородомъ овощовымъ отъ стѣнки простымъ трыбомъ отъ рогу замету дворного учинено есть вымѣроно: влѣво ку ставу середнему на Лодейницы такъ погною, яко проробку, хворосту, сѣножати и болота всего сумою моркговъ дватцать, прутовъ чотыры. То прышло и зостало яко споручное на сторону его милости князя Коширского.

Отъ тоежъ стѣнки вправо за огородомъ овощовымъ и на курганѣ погною, въ томъ же окрузѣ заросли, болота, лозы по стѣну волокъ мѣстскихъ всѣхъ вымѣроно моркговъ шестнадцать, прутовъ пять полъ. То тежъ, яко ку селидбѣ зручное, зостало и подано на сторону его милости пана старосты Дорогицкого. А ижъ въ тую тамъ часть князя Кошырского злѣва стѣнки учиненое перенесло и подало ся на сторону его милости моркговъ тры, прутовъ дватцать осмъ полъ, на то мѣстце его милости старостѣ такъ же много въ нагороду дано пры иншыхъ замѣнахъ кгрунтами бояръ Ходорковъ.

Млыны.

Подъ тымъ дворомъ Косовскимъ есть ставовъ два зъ млинами по одномъ колѣ: одинъ на рѣчцѣ Рудавцѣ, а другій троха нижей на тойже рѣчцѣ и на рѣчцѣ Лодейницы, а третій подъ Сторожовскимъ селомъ. Ино на сторону его милости пана старосты Дорогицкого зъ выдѣлку зосталъ ставъ подъ дворомъ на рѣчцѣ Рудавцѣ, а на Сторорожовщизнѣ зась зосталъ князю его милости Кошырскому, а третій середній, по половицы ихъ милостямъ держачы, ужывати и сполне направовати мають, маючы тежъ вольность тыхъ ставовъ зъ обу сторонъ, которые се ихъ {207} милостямъ достали, направовати и повышати воды кождый водлѣ потребы съ пожыткомъ своимъ.

Фольварокъ Косовскій на Марачовщынѣ,

въ которохъ будованья то есть. Свѣтлочка зъ сѣнью, напротивъ комора; драницами побитый домъ добрый; клѣточка на пивницы, пивничка старая; воротъ двои лихихъ; сырница новая зъ кганкомъ на столпъ, и подъ нею холодникъ зъ прутья уроблены, драницами побитъ; грыдня великая съ сѣнми, напротивъ изба старая лихая, дощками покрыта; стайня новая, великая, соломою покрыта; стаенка у воротъ малая, соломою крыта. Гумно великое петнатцать стѣны, другое меншое, обѣ гумни досыть добры, одрына сѣнная великая, одрынка малая евъя, свиренъ велки добрый зъ кганькомъ.

Пашни того фольварку выморкговапо всее во всихъ трехъ поляхъ съ погноями и зъ сѣпожатми, въ той же пашни лежачыми, волокъ двадцать чотыры, моркговъ двадцать тры, прутовъ двадцать два. И ровнуючы на ровные части тую пашню фольварку Марачовского съ пашнями фольварковъ заставныхъ, которые на сторону его милости князя Кошырского, яко у пана Дмитра Кіянина такъ и въ пана Войтеха Венцковского, приходить и належать мають, въ той пашни мѣло бы ся ещо додать его милости князю Кошырскому волокъ чотыры, морговъ десеть, прутовъ двадцать одинъ; лечь се за волоку одну моркговъ десеть и прутовъ двадцать одинъ стала нагорода князю Кошырскому въ селѣ Квасовичахъ. А въ пашни Фольварку Марачевского отмѣроно и отогнано его милости князю Кошырскому волокъ тры, мѣновите лежачые пры границы поля пана Венцковского, то есть ѣдучы зъ мѣстечка Косова гостинцомъ до села Кулешовъ въ клинѣ самомъ починаеться, гдѣ другая дорога до села Квасовицкого идеть межи тыми дорогами оба поль въ квадратѣ одномъ лежать ажъ до стѣны Жомойское, а тамъ стѣною Жомойтскою ажъ до стѣны поля пана Венцкозского. А ижъ тые тры волоки на тотъ часъ на рокъ 98 есть житомъ на его милости пана старосту Дорогицкого засѣяно, про то его милости князю Кошырскому завелося и подало съ позволеньемъ его милости пана Петра Стабровского также много поля его милости дворного на сѣвбу ярыны на весну прышлую поля крайнего дворного прыстѣнѣ, которая дѣлить волоки мѣстскіе съ тымъ полемъ дворнымъ, а кгды збожье зъ обу сторонъ здоймутъ, тогды вжо потомъ кождый при своей власности, яко се тутъ въ роздѣлку описано, зостати маеть. А остатокъ тое пашни, што одноей есть зъ селидбою и будованьемъ Фольварковымъ, то на его милость пана старосту Дорогицкого належить и належати маеть. О вжатью збожья вшелякого натой пашни вѣдомости не могломъ взять, кгдыжъ врадникъ Косовскій панъ Янъ Коцпачевскій повѣдилъ, ижъ того справы давать ни кому не повиненъ, кгдижъ то пашня пана его, а часть его милости князя Кошырского пашни у заставниковъ, которое они уживають.

Огородники того фольварку Марачовского,

въ той же пашни въ третемъ полю сѣдячые. Имена тыхъ огородниковъ: Пархута Савчычъ, въ него сыновъ тры: Панасъ, Андрей, Артюхъ. Лукъянъ Евсеевичъ, въ него сыновъ чотыры: Яковъ, {208} Ѳедоръ, Степанъ, Ивашко. Миколай Петруковичъ, прыхожый; у него шурыновъ два, отчичовъ Косовскихъ, Адамъ и Ивашко. Яковъ Бородичъ, въ него сыновъ чотыры: Павлюкъ, Кондратъ, Иванъ (*). Иванъ Полешко, въ него сыновъ тры: Степанъ, Андрей, Василь. Артюхъ, прыхожій чоловѣкъ, въ него сынъ одинъ Грышко. Матей Лапичъ, въ него сыновъ два: Мартинъ и Гаврыло. Кузма Даниловичъ, въ него сыновъ тры: Степанъ, Ѳедоръ, Ивашко.

Што се тычеть тыхъ огородниковъ пры томъ фольварку Марачевскомъ, пры которомъ есть ихъ личбою осмъ, а подъ ними волокаодна, моркговъ осмнатцать, прутовъ шесть, тые огородники на сторону его милости пана старосты Дорогицкого зоставаютъ, которыхъ есть повинность робить два дни въ тыдень, и на рокъ каждый по грошей петнадцать платять. А ижъ ихъ половица мѣла бы прыйти на сторону его милости князя Кошырского, бачачы быть съ трудностью ихъ переношенье, але зоставуючы ихъ на тыхъ же селидбахъ ихъ пашни, которая на его милость иана старосту Дорогицкого зостала, на то мѣстце отдавшы его милости пану старостѣ такъ много кгрунту, яко подъ ними вымѣроно, волоку одну, моркговъ осмнадцать, прутовъ шесть, боярскими землями Ходорками, яко то есть нижей шырей описано. Нагорода дана его милости князю Кошырскому въ селѣ Квасовичахъ волокъ осѣлыхъ двѣ.

Мѣстечко Косовское.

Першая перея, которая се почынаеть, идучы отъ двора Косовского въ рынокъ, по правой руцѣ, на которой и Церковь стоить, (слѣдуетъ перечень 32 лицъ, при каждомъ показанъ домъ и ого родъ (**).

Въ той переи Церковъ заложенья Светого Семена, вжо зветшалая, и въ самой церкви згола ничого накладу, ани книгъ церковныхъ нѣтъ, келихъ цыновый, старый, а звоновъ пры церкви завѣшоныхъ малыхъ два.

Пры той же переи стодола дворная, свѣтлица и изба чорная, вѣдь же вжо будованье старое, а огороды до нее нѣтъ, только на чомъ стодола стоить.

Корчомъ въ той переи показало ся, то есть: медовая одна, пивныхъ пять, горельченыхъ пять; рѣзниковъ на той переи два.

Тая перея зо всимъ, яко се вышей описало зъ Церковью и зъ корчмою уѣздною, зостала на сторону его милости князя Кошырского.

Другая перея, идучы отъ двора въ рынокъ, по лѣвой сторонѣ, гдѣ костелъ стоить (слѣдуетъ перечень 35 лицъ, при каждомъ показаиъ домъ и огородъ (***).

Пры той переи костелъ збудованый, ещо новый, лечъ въ нимъ згола ничого охендождтва и накладу ещо нѣтъ, потому жъ и наданья пикоторого, пляцовъ, ани огородовъ пры мѣстѣ не маеть. Дали справу войть и вси мѣщане Косовскіе, ижъ жвонъ одинъ былъ великій пры томъ костелѣ, але дей пани Яновая Мокгильницкая, кгды въ тыхъ минулыхъ недавныхъ лѣтѣхъ Косовъ держала, тотъ звонъ до имѣнья своего Воскрыницкого на Подляшье отпровадила.

Корчомъ на той переи показало ся, то есть: медовая одна, пивныхъ чотыры, горылченыхъ тры, рѣзниковъ на той переи два. {209}

Тая перея зо всимъ, яко се вышей описала, и съ костеломъ зостала на его милость пана старосту Дорогицкого.

Улочка Рожанская.

Ѣдучы къ мосту зъ мѣста по правѣ, перея по правѣ къ мосту идучы. (Слѣдуетъ перечень 7 лицъ, при каждомъ домъ и огородъ).

На той переи корчомъ пивныхъ двѣ, горельченыхъ двѣ.

Тая тежъ перея належить на сторону его милости князя Кошырского.

Другая перея по лѣвѣ, идучи до мосту. (Слѣдуетъ перечень 5 лицъ, при каждомъ домъ и огородъ.)

На той переи пивная корчма одна, горельченыхъ двѣ.

Тая зась перея на сторону его милости пана старосту Дорогицкого належить.

Волоки того мѣстечка Косовского, которыхъ уживаютъ мѣщане съ правое стороны переи. (Слѣдуетъ перечень 20 лицъ, изъ которыхъ 5 имѣютъ по волокѣ, а остальные по полволоки).

Тая волокъ дванадцать полъ належить на его милости князя Кошырского.

Волоки того жъ мѣстечка Косовского, которыхъ уживаютъ мѣщане зъ лѣвое стороны переи. (Перечень 19 лицъ).

Тая волокъ дванатцать полъ належить на сторону его милости пана старосты Дорогицкого, межы всихъ тыхъ же волокъ меншихъ на церковь попу вольныхъ здавна волокъ двѣ.

Застѣнки пры томъ же мѣстечку Косовскомъ. Межы волоками мѣстскими и села Сторожовского застѣнку моркговъ дватцать шесть держатъ Федоръ Воловичъ а Жданъ и Иванко, платечы особливе у концу волокъ Сторожовскихъ моркговъ полтора. Тые оба застѣнки зостали на сторону его милости князя Кошырского пры роздѣлку бояръ Грыцковъ и Жыбайловъ.

Особливе моркги мѣскіе польные. (Перечень 6 лицъ, при каждомъ моргъ).

Съ тыхъ половицу на его милость пана старосту Дорогицкого отъ волокъ мѣсткихъ, а на его милость князя Кошырского другая половица отъ застѣнку попа Косовского особливе пры выгонѣ мѣйскомъ надъ рѣчкою Лодейницою нижей ставу середнего моркгъ, а прутовъ петнасте на сторону его милости пана старости Дорогицкого. (Перечень 22 лицъ).

Вѣдь же, ижъ тые сѣножати не суть помѣрою пробованы, про то пры остатней прышлой помѣрѣ сѣножатей и болотъ, дворныхъ и сельскихъ гаевъ, боровъ и лѣсовъ маютъ быти помѣрены, и што ихъ вынесетъ по половицы ихъ на обѣ стороны ростяти.

Сумарыушъ.

Того мѣстечка Косовского и пожытковъ дорочныхъ зъ него.

Во всимъ мѣстечку въ обѣихъ переяхъ и въ улочцѣ Рожанской пляцовъ зъ огороды семдесятъ деветь.

Зъ тыхъ на церковь вольный пляцъ и огородъ одинъ.

Плачоно здавна и въ томъ року деветдесятъ семомъ зъ домовъ и огородовъ семидесятъ семи по грошей трытцети. Чинить копъ трытцеть деветь.

Корчомъ медовыхъ двѣ, пивныхъ двѣнадцать, горелчаныхъ двѣнадцать, плачечы зъ каждое корчмы по копѣ грошей, чинитъ копъ двадцать шесть. Рѣзниковъ чотыри, зъ которыхъ брано по каменю лою.

Волокъ всихъ мѣскихъ дватцать семъ. Зъ тыхъ на церковъ вольныхъ волокъ двѣ. Плачоно завше зъ волокъ дватцати пети по копѣ грошей. Чынитъ копъ дватцатъ пять. {210}

Пры тыхъ же волокахъ застѣнковъ было чотыри, съ которыхъ плачено грошей осмдесятъ, але вперодъ зоставаетъ застѣнковъ тры, зъ которыхъ чынити маеть грошей петдесятъ два.

Особно зъ моркговъ шести польныхъ по грошей шести, а зъ моркговъ сѣножатныхъ дватцати девети по грошей тры. Чынитъ копъ двѣ, грошей тры.

Сума прыходовъ зъ мѣстечка Косовского зъ плацовъ, городовъ, корчомъ и застѣнковъ чынить копъ 92 грошей 3.

Вѣдь же которого року бывало корчомъ въ мѣстечку большъ и прыходу бывало большъ. А особливе зъ того жъ мѣстечка торгового, ярмарочного, броварного, зъ млыновъ за вымелки и зъ двухъ стодолъ въ мѣстечку и въ Кулешохъ арендою прыходило всего копъ осмдесятъ пять.

Волость Косовская.

А напервѣй списанье селъ и кгрунтовъ вольныхъ, заставою не заведеныхъ, на сторону его милости пана старосту Дорогицкого зъ выдѣлку належачыхъ.

Село Кулешы.

(Перечень 31 лица, съ семействами).

А особливе въ томъ селѣ неосѣлыхъ, пустыхъ волокъ 3 и моркговъ дватцать осмъ.

Въ томъ селѣ есть стодола на гостинцу збудованая, тая на сторону его милости пана старости Дорогицкого зоставаеть, кгдыжъ за то его милости князю Кошырскому нагорода певнымъ кгрунтомъ тутъ особно описанымъ стала. Пры томъ же селѣ застѣнку врочыщомъ Репницкого вымѣроного было волокъ 4. Который то застѣнокъ одданъ тежъ на сторону его милости пана старости Дорогицкого пры боярынѣ Ящолтѣ, выполняючы личбу кгрунту бояръ Грушовъ, зосталыхъ на сторону его милости князя Кошырского.

Село Милейки.

(Перечень 34 лицъ, съ семействами.)

А особливе въ томъ селѣ не осѣлыхъ пустыхъ, съ цыншовыми осадными волоками,волокъ деветть и моркговъ семъ.

Село Сторожовщына.

(Перечень 18 лицъ, съ семействами).

Въ томъ селѣ всихъ волокъ восемъи моркговъ восемъ, кромъ волокъ двохъ и моркговъ осми, которыхъ уживаеть въ томъ селѣ панъ Янъ Корпачевскій на службѣ боярской.

Село Ходорки въ застѣнку.

(Перечень 13 лицъ).

А то списанье селъ подданыхъ и кгрунтовъ на сторону его милости князя Григоря Кошырского, такъ вольныхъ на его милости прыходячыхъ, яко и заставныхъ его милости окуповать належачыхъ.

Село Квасовичы.

Въ томъ селѣ всихъ волокъ 16 полъ и моркги 2, которыхъ зъ роздѣлку на его милости пана старосту Дорогицкого прышло волокъ чотыри осѣлыхъ. (Слѣдуетъ перечень 7 лицъ, съ семействами).

Пры томъ роздѣлку прыповѣдалъ справомъ своимъ панъ Войтехъ Венцковскій, ижъ за презыскъ на его милости пану старостѣ Дорогицкомъ справа въ сумѣ пенязей держитъ въ томъ селѣ чоловѣка 1 Юрья Лопуха.

А то подданые въ томъ же селѣ {211} Квасовицкомъ, его милости князю Копшырскому належачые, выровныванемъ подданыхъ осѣлыхъ и за нагороду огородниковъ пры Фольварку Марачевскомъ, такъ же и за волоку моркговъ десеть, прутовъ 21 пашни дворное на Марачовщизнѣ. (Перечень 19 лицъ. съ семействами).

Тогожъ села Квасовичъ за рѣчкою Федоскою проробку въ застѣнкахъ волокъ двѣ, моркговъ чотырнатцать, прутовъ трынадцать; и до того Юрашковского села волока 1, и ктому моркговъ двадцать тры, пры боку волокъ мѣйскихъ Лопенпнскихъ, на которыхъ седитъ Ерома Клюйвода, того всего чынить волокъ чотыры, моркговъ семь, прутовъ петнатцать. То дано его милости князю Кошырскому въ нагороду стодолы въ селѣ Кулешохъ на гостинцу великомъ, которая пожытокъ не подлый до року чынила зъ аренды корчмы, и зъ мыта, которое тамъ бирано бываетъ, бо ачъ на сторону его милости князя Кошырского въ мѣстечку Косовскомъ стодола есть зъ выдѣлку дана и на сторону его милости зостала, лечъ ижъ не естъ на гостинцу, про то никоторого пожитку не чынила.

Село Жомойтское.

У его милости пана Даниля Хребтовича писара земского Слонимского заставное, его милости князю Кошырскому окуповать на сторону свою належачое. (Перечень 45 лицъ, съ семействами).

Въ томъ селѣ пустыхъ и неосѣлыхъ волокъ тры и моркговъ пять.

Село Юрашки.

Заставное у тогожъ пана писара земского Слонимского. (Перечень 12 лицъ, съ семействами).

Въ томъ селѣ пустыхъ волокъ тры и моркговъ шестнатцать, и особливе пры томъ же селѣ моркговъ шесть.

Селцо Жеребятники.

Сѣдячые, яковъ застѣнку, по розну заставные у тогожъ пана писаря земского. (Перечень 10 лицъ, съ семействами).

Сельцо Бобрыки.

Заставные у тогожъ пана писара земского Слонимского. (Перечень 3 лицъ, съ семействами).

Въ томъ сельцу волокъ чотыри, моркговъ петнадцать, ктому въ концу волокъ ихъ подъ боромъ Бѣлавицкимъ проробку моркговъ дватцать два полъ, и надъ то особливе лѣсу и проробку волока одна, моркговъ семнатцать.

Тотъ же панъ писаръ держитъ въ заставѣ пры селахъ вышей помененыхъ дворчыкъ боярскій, названый Балверовщизна, въ нимъ зъ селидбою дворною, зъ огороды, зъ погноями, съ польми оремыми и зъ зарослями вымѣроно волокъ чотыры, моркговъ дватцать одинъ, прутовъ семъ.

За то въ нагороду дано его милости пану старостѣ Дорогицкому фольварокъ боярскій, прозываемый Ходорки, зъ бояры въ немъ мѣшкаючыми.

Фольварокъ Савицковскій.

Зъ селы, людми и кгрунты до него заставными у пана Дмитра Васильевича Кіянина.

Будованье того Фольварку: напервѣй дворъ самый, садъ около отиненъ, такъ же и самый дворъ отиненъ старымъ будованьемъ, свѣтлицъ двѣ зъ сѣнми старые драницами крыто, покровя южъ {212} стара, свѣтлочка малая отъ пекарни, въ ній пецъ зъ кафлевъ старыхъ, простыхъ, такъ же противку тое свѣтлочки другая свѣтлочка также старая, столовъ два, лавокъ тры, пивннчка новая, дощками барзо благими покрыта, сверенковъ старыхъ чотыры, домъ велькій старый, опадлый, въ той свѣтлицы онадлой лавъ тры старыхъ, въ гумнѣ клунь старыхъ двѣ, озеродовъ тры, хлѣвовъ для быдла барзо злыхъ зо тры.

Пашни того фольварку дворное есть волокъ семъ, моркговъ дватцать пять, то на сторону его милости князя Кошырского прышло мѣсто пашни фольварку Марачевского, на сторону его милости пана старосту Дорогицкого зосталого.

Село того Фольварку Скураты.

(Перечень 11 лицъ, съ семействами).

Въ томъ селѣ всихъ волокъ шесть, моркговъ шестнатцать, прутовъ двѣнатцать полъ.

Особливе межы кгрунтами Ящолтовыми волокъ пустыхъ пять, моркговъ двѣнатцать, прутовъ петнатнать, которыхъ волокъ тые жъ подданые на Цыншу уживають.

Натто межы Кулешами и стѣною пана писаровою есть моркговъ дватцать чотыры.

Село Ючевичы.

(Перечень 10 лицъ, съ семействами).

Въ томъ селѣ осѣлыхъ волокъ семъ, а пустыхъ волокъ чотыры, моркговъ дватцать пять, прутовъ двѣнадцать полъ. Особливе въ застѣнку Матей Ивановичъ, въ него сыновъ тры: Степанъ, Пархута, Артемъ волока одна.

Фольварокъ Подрезовскій.

Заставный у пана Войтеха Венцковского.

Будованье того фольварку вольное, водлѣ описаня листу заставного небощика пана Миколая Остика.

Пашня того Фольварку съ пашнею Фольварку Савицковского зо всимъ прышло и зостало на сторону его милости князя Кошырского. (Слѣдуетъ перечень 13 лицъ, съ семействами).

Въ томъ селѣ волокъ шесть полъ. А особливе въ застѣнку волока, одна, моркговъ шесть, прутовъ дватцать пять.

Тое волости Косовское знесене альбо списане повинности, яко и по чому зъ волокъ осѣлыхъ осадныхъ тяглыхъ по сесь часъ зъ роздѣлку цыншъ плачоно, и податки иные давано, и повинности полнено, кромъ волокъ пустыхъ на розныхъ мѣстцахъ, теперъ въ помѣру и въ личбу волокъ прыведеныхъ, и кромъ волокъ, которые се теперъ пры томъ роздѣлку зъ пробы быть оказали большою личбою, нижли въ старомъ инвентару было въ селахъ волокъ описано, зъ чого ни который платъ не шолъ.

А личба волокъ водлѣ старого инвентара показалася въ селахъ вольныхъ, заставою не заведеныхъ, которыхъ его милость панъ староста Дорогицкій въ уживанью своемъ былъ, волокъ тяглыхъ шестдесятъ деветь, а осадныхъ трынатцать, зъ которыхъ то осадныхъ плачоно зъ волокъ шести по копъ двѣ, зъ волоки одное копу одну и грошей сорокъ. Зъ волоки одное копу одну, грошей трытцеть, зъволокъ пяти по грошей трытцеть тры, а ктому по дванатцеть толокъ въ рокъ служити повинни кромъ сторожы, а зъ тяглыхъ цыншу по грошей сорокъ. Надъ то вси однако давали такъ осадни и тяглые зъ волоки бочку одну жыта, овса бочку одну, сѣна возъ одинъ, зъ волокъ десети яловица одна и бараны два, зъ волокъ двухъ гусь одинъ, зъ волоки зась одное куръ двое, яець десеть, льну десятокъ. {213}

Роботы по тры дни въ тыдень, толокъ черезъ рокъ дванатцеть, подвода, гдѣ потреба окаже, а сторожа зъ тяглыхъ чергою. Таковаяжъ повинность и зъ заставныхъ люди есть, то есть, зъ села Жомойтского, Юрашковского и въ иныхъ селахъ, кромъ шести волокъ Жомойтскихъ, зъ которыхъ платятъ по копъ двѣ. А зъ Савицковского фольварку волокъ пять неосѣлыхъ по грошей осмъ, кромъ вшелякихъ инныхъ повинностей. Зъ волокъ семи тяглыхъ только по грошей тритцеть. А зъ людей Фольварку Подрезовского зъ волокъ трохъ полъ по грошей дватцеть чотыры, а зъ волокъ чотырохъ по грошей трытцеть. А што се тычетъ роботъ и иныхъ повинностей, то все заровно зо всими иными полнили.

Бояре имѣнья Косовского.

На его милость княжа Кошырское належачые.

Бояре Грушы. ІІодъ ними зъ селидбою, зъ огороды, зъ погноями, съ польми пашными, зъ зарослями, зъ багнами волокъ петнатцеть, моркговъ пять. Надъ то въ томъ же кгрунтѣ огородниковъ чотыры. Къ тому подъ домомъ ставокъ и млынокъ малопожыточный, гдыжъ вода барзо мала, зъ тымъ со всимъ зостало на сторону его милости князю Кошырскому.

Грыцки бояре. Подъ ними вымѣроныхъ волокъ пять, моркговъ дватцеть.

Бояре Зыбайлы и Запечки. Подъ ними вымѣроныхъ волокъ шесть и моркговъ два, и до того застѣнокъ при мѣстѣ и при селѣ Сторожовскомъ вымѣроный, которого было моркговъ дватцеть семъ. Зъ того моркговъ чотырнадцеть, пры тыхъ боярехъ, дано и належати маетъ на сторону его милости князя Кошырского, а моркговъ двѣнатцать тогожъ застѣнку придано до кгрунту Ѳедора князя, выполняючы зъ надаткомъ Мартина Вертейка кгрунтъ, подъ которымъ Вертейкомъ есть волокъ двѣ и моркгъ одинъ.

А тые бояре належачые зъ роздѣлку на его милость пана старосту Дорогицкого: Боярынъ Ящолдъ, подъ нимъ волокъ одинатцеть, моркговъ шесть, прутовъ дватцеть.

А въ застѣнку тамъ же прылегломъ Репниковскомъ волокъ чотыри.

За пашню дворца боярского Балберовского волокъ чотыри, моркговъ дватцеть одинъ, прутовъ семъ, который въ заставѣ на тотъ часъ держитъ панъ писаръ земскій.

Тежъ загородники на Марачевчызнѣ за волоку одну моркговъ восемнатцеть, прутовъ семъ и за морки три прутовъ дватцеть восемъ полъ, што за дворомъ и огородомъ на его милость князя Кошырского перенесло въ нагороду того всего личбою за волокъ щесть, моркговъ тринадцеть, прутовъ одинатцеть, дано на сторону его милости пана старосты Дорогицкого боярына Ходорка, подъ которымъ селидбы дворное, огородовъ, погноевъ есть вымѣроныхъ зъ польми пашными волокъ щесть, моркговъ шестнатцетъ.

Ѳедоръ князь. Подъ нимъ волока одна, моркговъ дватцеть одинъ, и къ тому моркговъ двѣнатцеть, приданыхъ ку выполненью за кгрунты Вертейковы при мѣстечку Косовскомъ. Боярынъ Левко. Подъ нимъ волокъ чотыри, моркговъ десеть. Боярынъ Миско Тышкевичъ. Подъ нимъ волокъ три, моркговъ восемъ. Ивашко Михниковичъ боярынъ, подъ нимъ волокъ двѣ, моркговъ семъ и лѣсу особно моркгъ одинъ. Боярынъ Стрѣлець зъ Ѳедоромъ. Подъ ними волокъ двѣ, моркговъ тринатцеть, прутовъ десеть. Янъ Корпачевскій на {214} Сторожовщынѣ, волокъ двѣ, моркговь восемъ. Тые вси бояре зо всимъ належатъ зъ выдѣлку на его милость пана старосту Дорогицкого. Повинности съ тыхъ бояръ, ани подачокъ ни которыхъ нѣтъ, только зъ листи, гдѣ потреба укажетъ чергою ѣждяючы.

А што се дотычетъ сѣножатей дворныхь, гаевъ, лѣсовъ, зарослей, боровъ и мѣстцъ багнистыхъ и сѣножатей въ болотѣхъ, надъ рѣкою Грывдою и Бусетью и на иныхъ всякихъ мѣстцахъ такъ дворныхъ мѣйскихъ и селъ вольныхъ по томужъ и селъ заставныхъ и боярскихъ, которые се помененые кгрунты теперъ за тымъ выѣздомъ для великихъ поводи, ижъ трудно было до помѣры ихъ прыйти, не суть змѣроны и роздѣлены, про то на то ку выѣзду, помѣрѣ и роздѣлку досконалому складаю рокъ на день свята Громницъ Римского свята, водлѣ нового календару въ року прыйдучомъ 1698, на который я рокъ зъѣхавши до того имѣнья Косовского скончити, и то до скуточного и вѣчногу дѣлу прывести, и реестра того остатнего дѣлу на обѣ стороне ихъ милостямъ дати маю, до рѣки Грывды зъ обу сторонъ вольный вступъ на тотъ часъ, и потомъ зоставити ихъ милостямъ маетъ, такъ до ловенья рыбъ, яко и до гоновъ бобровыхъ.

Которого того роздѣлку имѣнья помененого Косовского, яко се черезъ мене подкоморего на обѣ сторонѣ сталъ, што ся все меновите въ томъ реестрѣ вышей описало, даломъ его милости пану Мокачовскому княжати его милости Кошырскому сесь мой удѣлчы реестръ зъ моею печатью и съ подписомъ руки мое власное, а при томъ роздѣлку и поданью, штонаихъ милости зъ выдѣлку належало, были пры мнѣ возные два повѣту Слонимского Андрей и Лукашъ Васильевичы Мизкгиры и пять шляхтичовъ: Станиславъ Петровичъ Бусескій, Кондратъ Конарскій, Крыштофъ Матеевичъ Жукъ, а Станиславъ Малиновскій, Дмитръ Ильичъ, которые вси пры печати моей тежъ печати свои приложыли, а умѣючіе и руки подписали. Писанъ въ Косови року, мѣсеца и дня вышей писаного.

Подписи: Грыгорей Трызна подкоморый. Ендрей Васильнчъ Мизькій возный власная рука. Лукашъ Васильевичъ Мизьскій возный рука власная. Дмитрій Ильичъ рука власна. Крыштофъ рука власна.

Внизу восемь тисненыхъ печатей.

_____________

(*) Пропускъ въ подлинникѣ.

(*) Подъ 13 № значится: Устиній попъ Русскій, купный его домъ и огородъ.

(**) Подъ 21 № значится: попъ Русскій, здавна церковный домъ и огородъ.

Опубликовано: Археографический сборник документов, относящийся к истории Северо-Западной Руси Изд. при Упр. Вил. учеб. окр. Т. 1. / Вильна, 1867-1904. - 28.
Т. 1. - 1867. - X, 409 с.