На главную сайта   Все о Ружанах

АКТЫ,

издаваемые

ВИЛЕНСКОЮ АРХЕОГРАФИЧЕСКОЮ КОМИССІЕЮ

Томъ XVIII.

АКТЫ О КОПНЫХЪ СУДАХЪ

Вильна
В типографіи А.Г. Сыркина, Большая ул., собственній домъ, № 88
1891

 

{21}

1575 г., Сентября 18 дня.

Изъ актовой книги Слонимскаго гродскаго суда
за 1574-1579 г., № 7864, л. 302 на оборотѣ.

40. Разслѣдованіе на копѣ дѣла о порубкѣ лѣсу,
порчѣ пчелъ и захватѣ сѣна.

 

Року XX (1575), месеца Сентебра XX (18) дня.

Офанасъ Гаврыловичъ, подстаростий Слонимский. Пришодши до книгъ кгродскихъ Слонимскихъ возный повету Слонимского Григорей Васильевичъ Мизкгиръ созналъ тыми словы: ижъ будучи мне зъ уряду кгродского Слонимского отъ вашей милости, пане подстаростий, посланымъ и приданымъ на потребы врадника ее милости вельможное панее Васильевое Тишкевичевое, воеводиное Смоленское, пани Настасьи Андреевны Лососинского Григорья Васильевича приданымъ, былъ есми при томъ вряднику Лососинскомъ, а при мне на тотъ часъ стороною были люди добрые, осочники Лысковскіе, на име Степанъ Логвиновичъ а Федоръ Кулешъ. на року зложономъ, который врядникъ пани Крыштофовое Садовское пани Ганны Радивиловны Селицкий, именемъ Миколай Радчичъ, черезъ писанье свое зложилъ былъ; то пакъ на томъ року зложономъ, року теперешнего тисеча пятьсотъ семьдесятъ пятого, месеца Августа девятогонадцать дня, врядникъ Лососинскій панъ Григорей Васильевичъ, маючи мене возного и тыхъ людей добрыхъ сторонныхъ вышей мененыхъ при собе, выехалъ на границу стародавного обычая звыклого, врочищомъ у в Олешца, о порубанье дерева бортного зо бчолами двухъ сосонъ, где се тая шкода стала отъ подданыхъ ее милости пани Крыштофовое Садовское, пани Ганны Радивиловны Селецкихъ, кгды жъ дей водле стародавного обычая, на томъ местцу и врочищу, копа звыклая бывала, и приехавши дей войтъ Селецкій на име Манецъ Козичъ и подлазникъ Гордей Микитичъ, а Федоръ Лукъяновичъ, Степанъ Погорелковичъ отказъ вчинилъ тыми словы, ижъ врадникъ нашъ Селецкий панъ Миколай Рудчичъ и мы сами теперешнего дня на копу становитися не можемъ за теперешнимъ часомъ пашнымъ. А потомъ врядникъ Лососинский повѣдилъ: войте Селецкий, едь ты зъ нами на огледанье тое шкоды, порубанье сосонъ и покруженье и порубанье ульевъ зо бчолами. Войтъ оный Селецкий поведилъ: чого я мамъ тамъ ехати, бо то и сами вѣдаемо, же тое сосонье порубаное зъстародавпа есть Лососинское и пуща то Лососинская, а ведь же дей и потомъ шкодникъ вамъ згинути не можетъ. Потомъ тежъ на другомъ року, отъ тогожъ врадника Селецкого Миколая Радчича о туюжъ шкоду зложономъ, яко дня сего нинешнего месеца Сентебра шостогонадцать дня у пятницу року теперешнего семьдесятъ пятого быломъ, а при мне таяжъ сторона вышей мененая была. И кгды выехалъ врядникъ Лососинский панъ Григорей зъ нами на тое местцо и врочищо у в Олешца и ожидалъ врядникъ Селецкий и съ подъдаными Селецкими, чинечи водле звыклого и стародавного обычая на томъ врочищу у в Олешцу, самъ выехалъ и о шкоду вышей мененую копу чинилъ, нижли яко самого врадника Селецкого, также и подданыхъ Селецкихъ, ку той копе {22} належачихъ, яко на рокъ зложоный, не было и никоторое ведомости въ томъ вряднику Лососинскому не вчинено, тотъже врядникъ ее милости пани воеводиное Смоленское Лососинский панъ Григорей Васильевичъ оповедилъ и обводилъ мною на другомъ местцу порубанье сосонъ бортныхъ и дерева простого, на будованье годного, не мало, которое порубавши и пожжоно и побранье трохъ стоговъ сена, што дей стало во властной пущи ее милости паней его Лососинской, врочищомъ у в оступа Ольхового, року теперешнего тисеча пятьсотъ семьдесятъ пятого, месеца Сентебра пятогонадцать дня, у четвергъ, за наеханьемъ кгвалтовнымъ отъ тогожъ врядника ее милости пани Крыштофовое Садовское, пани Ганны Радивиловны Селецкого Миколая Радчича а отъ войта Селецкого Маньца Козича и полазника Гордея Микитича и помочниковъ ихъ подданыхъ ее милости тамошнихъ Селецкихъ, на которыхъ дей местцахъ никоторого входу имъ и заседанья копъ дей не бывало. Которое сознанье возного, за прозьбою врядника Лососинского Григорья Васильевича, до книгъ кгродскихъ Слонимскихъ записано есть.

 

 

 

Яндекс.Метрика